جيل التمانينات لما كبر

جيل الثمانينات لما كبر
انا شفت جروب جميل اوي علي الفيس بوك بيتكلم عن الحاجات اللي كانت موجودة في ايم طفولة ومراهقة جيل الثمانينات بجد الحاجات دي فكرتني بذكريات جميلة اوي يعني مثلا مين فينا فعلا ملبسش بنطلون انتربول دبل شفت مين فينا متفرجش علي كابتن ماجد وكرنبة وبقلظ، مين فينا محطش جيل في شعره علشان يفرغه ويعمله سبايكمين فينا مشتراش شريط what now اللي عاوز اتكلم عليه دلوقتي لما جيل التمانينات كبر وبقي في مرحلة الجامعة والتخرج يا تري ايه الحاجات اللي بتشغل تفكيره في الفترة دي وكمان ايه الحاجات السايدة في عصره

1- جيل التمانينات هو اللي دخل الكلية في بداية انتشار الكمبيوتر في مصر وبقي منظر عادي جدا انك تشوف واحد ماشي طول النهار وهو ماسك هارد وبيلف بيه علي صحابه

2- جيل التمانينات هو اللي اكتشف ان الاعلام الحكومي طول الوقت ده هو بيضحك عليه لما ابتدا يشوف الجزيرة والعربية لما الدش ابتدا ينشتر في مصر.

3- جيل التمانينات هو الجيل اللي لحق ال3310 وبعدين 6600 ايام ما كان ب3 الاف جنيه وبعدين مسك N70 ودلوقتي ماسك N73

4- جيل التمانينات هو الجيل اللي بيقعد دلوقتي في سايبر يبعت السي في بتاعته للشركات ويشوف الواد اللي عنده 12 سنة اللي قاعد جنبه بيصمم موقع علي النت ويقول (بيعملها ازاي دي).

5-جيل التمانينات هو الجيل اللي لما اتخرج قرر يعتمد علي نفسه بجد لان الحكومة مبقتش بتشغل حد.

6- جيل التمانينات هو اللي كان بيشتري الشرايط ايام ما كانت ب10 جنيه وبعدين لحق السيديهات قبل ما يبقي بينزل الاغاني دلوقتي من علي النت علي طول (ربنا يخليهولنا).

7- جيل التمانينات هو اللي دخل الجامعة ولحق موضة الووكمان اللي كان كله ماسكه في الوقت ده وبعدين اتطور وبقي الديسك مان واتطور دلوقتي وبقي الام بي ثري بلاير.

8- جيل التمانينات هو دلوقتي اللي بيتريق علي العيال اللي في ثانوي من اللي بيعملوه في الوقت اللي كان من يا دوب 10 سنين بيعمل زيهم بالظبط